ບົດກອນ “ ໄມ້ໃກ້ຝັ່ງ“
ແມ່ນວ່າມວນແມກໄມ້ . . . ງອຍງ່າກາງວັງຮາກຢັ່ງຕົມອົມດິນ . . . . . . ເພື່ອລຳລຽງຕົ້ນ
ໃບບິ່ນບາງເບືອນກ້ານ . . . . ໂຮມທານນະທີແມ່
ເຫຼືອແຕ່ຕໍຕ່ຳຕົ້ນ . . . . . . . ຊິຢືນຊົ້ນອີກດົນ ສ່ຳໃດ?
ດັ່ງດຽວຊຸມໝູ່ໄມ້ . . . . . . . ໃນທ່າແຄມເຊ
ຍາມລົມເຊໂຊຍພັດ . . . . . ແອ່ນເອນໂອນອ້ຽນ
ເປັນໄປຕາມແນວທ້ອງ . . . ກົດເກນທຳມະຊາດ
ບໍ່ອາດຄົງຢູ່ຢັ້ງ . . . . . . . . . ສະຖຽນເທົ້າທຸກວັນ ໄດ້ນາ
ຄົນອາດຫານເກັ່ງກ້າ . . . . . ວິຊາສາດເຊີງສິນ
ມີເຮືອນຮັງກິນນອນ . . . . . ຢູ່ຊອນເຊົາຊົ້ນ
ຊື່ສຽງພົ້ນພາຍຟ້າ . . . . . . . ໃສວ່ານິລັນດອນດົນແກ່ນ
ແມ່ນຫາກພໍເມື່ອມື້ . . . . . . ຄືຊິໄດ້ຫ່າງລາ
ເປັນດັ່ງໄມ້ມໍ່ໃກ້ . . . . . . . . ແຄມຝັ່ງໂງນເງນ
ຈັກຊິເອ່ນລຳລົງ . . . . . . . . ຄາບຄຸງຜືນພື້ນ ຍາມໃດ?
ບໍ່ມີໃຜຫວນຮູ້ . . . . . . . . . ຊະຕາກຳຕາຍເກີດ
ບໍ່ອາດຂຽນຂີດແຕ້ມ . . . . . ເຕີມເຕົ້າຕໍ່ເອງ ຊັ້ນເດ
ປະພັນໂດຍ: ຫຼານຍ່ານາງລາວ
ไม่มีความคิดเห็น:
แสดงความคิดเห็น