“ຖາມຂ່າວບ່າວເຊບັ້ງໄຟ“
ຍາມເມື່ອຈອນຈາກບ້ານ . . ຖານຖິ່ນຄາເມໝາຍມຸ່ງມາຫາຮຽນ . . . . ຮໍ່າຮອນຫວນຮູ້
ລາອາວອາລຸງປ້າ . . . . . . ມານດາດອມພໍ່
ທັງພະອວນອຸ່ນອ້າຍ . . . ຂວັນໃຈນ້ອງນາດນາງ
ຍາມທີ່ໄກຫ່າງອ້າຍ . . . . ໄປຢູ່ເມືອງຫຼວງ
ມີແຕ່ຫວງຫວນຄິດ . . . . ຄ່ຳຄະນິງນຳເຈົ້າ
ກົວວ່າບາບ່າວນັ້ນ . . . . . ຊິຜັນແປໄປຕ່າງ
ຍາມໄກນາງນາດນ້ອງ . . . ຊິມອງຊູ້ອື່ນຍິງ
ຫຼາຍສິ່ງນາງຄິດໄວ້ . . . . . ວາງວາດລະແວງນຳ
ບາງເທື່ອພໍມີແຮງ . . . . . . ເມື່ອທວນຄຳອ້າຍ
ກ່ອນຈາກໄປໄກບ້ານ . . . ຊາຍໄຂຂານຕໍ່
ຊິບໍ່ມີອື່ນຊ້ອນ . . . . . . . . ຊອນຂ້າງຄູ່ຄຽງ
ສຽງຄຳຈາກກ່າວກ້ອງ . . . ລ່ອງແມ່ເຊບັງໄຟ
ຂໍໃຫ້ເປັນພະຍານ . . . . . . ຕໍ່ຄຳຂານອ້າຍ
ຄັນສາຍເຊບໍ່ບົກແຫ້ງ . . . . ຄວາມຮັກແພງນັ້ນຄືເກົ່າ
ຍັງຊິໝາຍມຸ່ງໝັ້ນ . . . . . . . ພຽງນ້ອງໜຶ່ງດຽວ
ວັນນີ້ອ້າຍຄົດລ້ຽວ . . . . . . ທຽວທ່ອງທາງຜິດ
ຄິດຄາດຄວາມຄະນິງ . . . . ສິ່ງເຫັນພານພໍ້
ເຊບັງໄຟນັ້ນບໍ່ແຫ້ງ . . . . . . ຫາກແຮງເຕັມຕໍຝັ່ງ
ໄຫຼຫຼັ່ງລົງທົ່ວຖ້ວມ . . . . . . ເຮືອນບ້ານໄຮ່ນາ
ຄິດມາພໍບາດນີ້ . . . . . . . . . ແສນທີ່ທໍລະມານ
ເຫັນເຮືອນຊານຊາວຊົນ . . . ກົ່ນເພພັງມ້າງ
ຢ້ານທາງພະອວນອ້າຍ . . . . ເປັນໄປແນວໃໝ່
ນ້ຳຈຶ່ງໄຫຼຖ້ວມບ້ານ . . . . . . ເຮືອນຮ້ານກໍບໍ່ເຫຼືອ
ຢາກຊິເມືອເຢື່ອນຢ້ຽມ . . . . ຢາມພີ່ພາຍມານດາ
ແຕ່ກໍຄານຳຮຽນ . . . . . . . . ວຽກວົນວາຍວຸ້ນ
ພະໄມຄຸງຄອດບ້ານ . . . . . ເຮືອນຊານບ່ອນເຄີຍຢູ່
ໄດ້ແຕ່ດູຂ່າວຮ້າຍ . . . . . . . ໃຈນີ້ຫວັ່ນໄຫວ
ຄັນເມື່ອບາບ່າວອ້າຍ . . . . . ອອນອ່ານສານນາງ
ຂໍໃຫ້ວາງຄຳກອນ . . . . . . . ຕໍ່ນຳນາງນ້ອງ
ວ່າສາຍເຊບໍ່ໝອງເສົ້າ . . . . ຄືເດີມດາເກົ່າ
ຫຼືອ້າຍມາຍຕໍ່ນ້ອງ . . . . . . ຜູ້ເນົາຫ້ອງແຫ່ງໄກ ແລ້ວບໍ?
ປະພັນໂດຍ: ອຸລາ ພົມມະສຸກຂະ
ຫຼານຍ່ານາງລາວ
01. ຕຸລາ. 2019
ไม่มีความคิดเห็น:
แสดงความคิดเห็น