ແຮງໃຈໃນວັນທີ່ອ່ອນລ້າ
ຄືນໄສຍາມືດຄື້ມ............ຊຶມໂສກໂຊມໂຊ
ປ່ວຍມະໂນໃນຈິດ...........ຄິດພະວັງເວງເວີ້ງ
ເບີ່ງນະພາຜືນຟ້າ.............ລາຕີການມົວໝົ່ນ
ພະໄມວົນວ່າວຸ້ນ.............ຄູນເລື້ອຍລ່າແຮງ
ກຳແພງກັນກີດກັ້ນ..........ຝັນໃຝ່ໃນຮຽນ
ຄືຄວາມພຽນໃຈຕົວ........ເລີ່ມມົວມາຍມ້າງ
ຊີວິດກຸງເມືອງກວ້າງ........ທາງເຮົາຫາກຕັນຕຶ່ງ
ດຶງແຕ່ໃຈຄິດຮອດບ້ານ....ສະຖານເຄົ້າເກົ່າດາ
ຄະນິງຄຳວ່າເວົ້າ...............ລົມເລົ່າບໍ່ລືມລົງ
ພໍ່ແມ່ປົງວາຈາ..................ວ່າຫວັງຄອຍຖ້າ
ກ່ອນຈະຈອນຈາກບ້ານ....ມາຫາຮຽນຮໍ່າ
ຄຳມານດາບອກໃຫ້..........ໄຂແຈ້ງຕໍ່ຕົນ
ໃຫ້ລູກທົນອົດສູ້...............ຊູສາດເສີມວິຊາ
ທາງບິດາແລະມານດາ......ຊິຊ່ວຍເສີມສານສ້າງ
ເປັນກຳລັງໃຈໃຫ້.............ດວງໃຈຈົ່ງແຝງໃຝ່
ເຖິງມື້ນີ້ທຸກຍາກໄຮ້..........ກ້າວໄປວັນຕໍ່ໜ້າ
......................................ບຸດຕີຫຼ້າຊິສະບາຍ
ຄິດຄືນຄຳແມ່ໃຫ້..............ໃຈຊື່ນເບີຍບານ
ຈະເສີມສານຄວາມຝັນ.......ດັ່ນເດີນໄປເຖິງເປົ້າ
ບ່ອນທີ່ໝາຍເອົາໄວ້...........ໄກແນ່ຈະພຽນຍ່າງ
ບໍ່ນານຫວັງວ່າໄວ້..............ເອົາປະລິຍາຝາກໃຫ້
.......................................ພໍ່ແມ່ໄດ້ຊື່ນຊົມ ເຈົ້າເອີຍ
ไม่มีความคิดเห็น:
แสดงความคิดเห็น