. "ຕໍ່າຫູກຄອຍຊູ້"
ຍ່າວໆເຟືອນຝາດໄມ້ ໃຈນ້ອງຮໍ່າຄະນິງ ອ້າຍເດ່
ນ້ອງນີ້ ຕັ້ງໃຈພຽນຕໍ່າຜ້າ ຜືນແຜ່ນແພສະໃບ
ເຈຍລະໄນລິງລາຍ ຂອດສາຍເຊີງຝ້າຍ
ຄ່ອຍເກັບເກາະໄໝກໍ້ ທໍຕຳຕາມກີ່
ຢັນໄມ້ນີ້ຢຽບໄມ້ນັ້ນ ຟືມກະສັ້ນຫັ່ນຈຳ
ຈັ່ນໆຟືມຕໍ່າຕ້ອງ ສວຍຈ່ອງຄອງໄໝ
ໃຈກະວົນກະວາຍ ຄິດແນນຳເຈົ້າ
ເຮົາເຄີຍສັນຍາໄວ້ ຄວາມໃຈໄຂຕໍ່
ຊິພາພໍ່ແມ່ອ້າຍ ໄປຂໍນ້ອງນາດນາງ
ຍັງບໍ່ພໍທໍ່ນັ້ນ ອວນພີ່ຂານໄຂ
ບອກໃຫ້ນາງກະກຽມ ເສື່ອໝອນມວນມຸ້ງ
ທັງແພວາຜືນຜ້າ ສະໄບງາມພ້ອມພໍ່າ
ນ້ອງກໍພຽນຕໍ່າໃຫ້ ຄອຍອ້າຍສູ່ຂໍ
ພໍສິບສອງຜ່ານຜ້າຍ ຈຽງຍີ່ກາຍໄປ
ອ້າຍຊິມາຂໍນາງ ດັ່ງວາຈາໄວ້
ນ້ອງເກັບລິງລາຍເອ້ ອາພອນແພສົມມາແມ່
ທັງເຖົ້າແກ່ພີ່ພຸ້ນ ຕຽມແລ້ວສູ່ອັນ
ຄອຍແຕ່ວັນທີ່ອ້າຍ ຊາຍແຮ່ຂັນມາ
ເຖົ້າແກ່ໂຄດລຸງຕາ ແຮ່ຂັນຂໍນ້ອງ
ສອງສາມເດືອນຄອງຖ້າ ລົມໜາວມາກະເລີຍລ່ວງ
ກົດກະໃຈໜ່ວງນ້າວ ຫາອ້າຍບ່າວພີ່ຊາຍ
ແຮງລົມຕີໄມ້ຊ້າຍ ຕີງໄຂວ່ໄປມາ
ຄືວ່ານາງຫວນຫາ ອ່າວອາວອນນຳຊູ້
ບ່າວຜູ້ເຄີຍສັນຍາໄວ້ ຫຼາຍວັນບໍ່ເຫັນອວ່າຍ
ຫຼືໄປມີມາກຊູ້ ທາງບັ້ນບ່ອນໄກ ບໍເດ?
ຫຼື ຫຼອກນ້ອງຫງາຍທາງລົ້ມ ກົ້ນຂີ້ທັ່ງທາງຢືນ
ຕົວະໃຫ້ກືນກິນໜາມ ຄັ່ງຄໍຄາຄ້າງ
ແພອີ່ນາງກາຍເປັນຮ້າງ
ອວນຊາຍວາງປະຖິ້ມ ໜີໄປຊີມລາບໄກ່
ແລ້ວເລີຍລະນ້ອງໄວ້ ຄຸມຈໍ້າປົ່ນປູ ຊັ້ນບໍເດ?
ເປັນຈັ່ງໃດ ຂໍໃຫ້ໄຂຂ່າວຂໍ້ ຂານຕໍ່ນວນນາງ
ຢ່າໄດ້ວາງເມີນເສີຍ ໃສ່ເລີຍນວນນ້ອງ
ຫຼືໃຫ້ນາງໄລລືມອ້າຍ ບໍ່ຫວັງຄອງຊິລືມງ່າຍ
ຄັນເຂົ້າສານບໍ່ເປັນໜໍ່ກ້າ ເມືອໜ້າຊິບໍ່ລືມ ພີ່ເຮີຍ
ຄົງທົບຟືມຈັ່ນຈັ້ນ ຝັນຕໍ່ຕາມຫວັງ
ວ່າຊາຍຍັງຊິຫວນ ຕ່າວມາຫານ້ອງ
ແພຕາລ່ອງຕາໂລ້ ໂງງົມຕົມໝົ່ນ
ດົນປານໃດບ່າວອ້າຍ ຊາຍຊູ້ຊິສູ່ຂໍ ນາງນໍ?
ປະພັນໂດຍ: ຫຼານຍ່ານາງລາວ
໑໕. ໐໒.໒໐໑໙
